Մեր գործունեությունը

Արցախ

Կարեւորելով տարածաշրջանում բնակչության աճի խթանումը՝ մենք փնտրում ենք հարթակներ, որոնք կօգնեն Արցախին հասնել կայուն զարգացման։

Մեկնարկել է
2015
Հանրային զեկույց

Արցախի զարգացման ծրագրի նպատակն է տարածաշրջանում ապահովել կայուն զարգացում՝ նպաստելով մշակութային ժառանգության պահպանմանն ու զգալիորեն խթանելով բնակչության աճը: Աշխարհաքաղաքական լուրջ մարտահրավերներին առերեսվող Արցախի տնտեսության զարգացումը, պատմամշակութային ժառանգության պահպանումը և մարդկային կապիտալի զարգացումն այժմ կարևոր է, քան երբևէ։

Արցախում բնակչության աճին նպաստելու համար IDeA հիմնադրամը դրամական աջակցություն է տրամադրել նորածին երեխա ունեցող արցախցի երիտասարդ ընտանիքներին: 2008 թվականին մենք միացել ենք «Արցախյան մեծ հարսանիք» նախաձեռնությանը, որի շրջանակում մեկ օրում կազմակերպվել է 700 զույգի պսակադրություն: 5 տարում այս ընտանիքներում ծնվել է շուրջ 1 100 երեխա:

IDeA հիմնադրամի կողմից Արցախում իրականացվող մեկ այլ կարևոր ծրագիր է Մուշկապատ գյուղի Սուրբ Աստվածածին եկեղեցու վերականգնումը: 17-րդ դարի եկեղեցու վերականգնման ծրագիրը նախաձեռնել է բարերար, որն ընտրել է IDeA-ն որպես ծրագիրն իրականացնող հարթակ: Եկեղեցին իր դռները բացեց տեղացիների ու զբոսաշրջիկների առաջ 2017 թվականի մայիսին:

Սատարելով Արցախի կառավարության նախաձեռնությանը` 2014 թ.-ից «Արևելյան պատմական ժառանգության վերածնունդ» (Revival of Oriental Historical Heritage Foundation) հիմնադրամը ձեռնարկել է Շուշիի Գոհար տիկնոջ Վերին մզկիթի վերականգնման ծրագիրը, որն իրականացվում է «IDeA» հիմնադրամի՝ Արցախի զարգացման ծրագրի շրջանակում:

Շուշին Արցախի յուրահատուկ վայրերից մեկն է, իսկ Գոհար տիկնոջ Վերին մզկիթը՝ Շուշիի հին քաղաքի մշակույթի և հարուստ պատմական անցյալի անբաժանելի մասը: Ծրագրի շրջանակում ամբողջությամբ պահպանվել է 19-րդ դարի մզկիթի առաջնային տեսքը, հիմնովին վերականգնվել է նաև մզկիթի հարևանությամբ գտնվող մեդրեսեի շենքը (հոգևոր վարժարան), ընդլայնվել և բարեկարգվել է հարակից տարածքը: Մզկիթի վերականգման ծրագիրը թույլ է տալիս պահպանել և ներկայացնել Շուշիի ու տարածաշրջանի պատմամշակութային ժառանգությունը, ինչպես նաև նոր կենտրոն ստեղծել Արցախի զբոսաշրջային քարտեզի վրա: Վերականգնված մզկիթը բացել է իր դռները այցելուների առջև 2019 թ. հոկտեմբերին:

IDeA հիմնադրամի նոր գաղափարներից է կառուցել Արցախի մայրաքաղաք Ստեփանակերտն ու մշակութային կենտրոն հանդիսացող Շուշին միացնող ճոպանուղի, որը կարևոր դեր կխաղա տարածաշրջանի տրանսպորտային համակարգի արդիականացման գործում և կդառնա զբոսաշրջիկների ու տեղացիների համար նոր դիտարժան վայր։ Ծրագրի հայեցակարգը ներկայում գտնվում է քննարկման փուլում: