Մեր գործունեությունը

Դիլիջանի զարգացում

Դիլիջանն ունի անհրաժեշտ ներուժը Հայաստանի ամենաբարեկեցիկ տարածաշրջանը դառնալու համար: Մեր նախագծերի նպատակն է Դիլիջանը դարձնել մշակութային, կրթական, առողջապահական և զբոսաշրջային կենտրոն։

Մեկնարկել է
2012
Հանրային զեկույց

IDeA-ն Scholae Mundi հիմնադրամի և Դիլիջանի Զարգացման հիմնադրամի հետ միասին հատուկ ուշադրություն է դարձնում այս տարածաշրջանի զարգացմանը։

Խարսխային նախագիծը UWC Դիլիջան դպրոցն է, որը հետխորհրդային տարածքում UWC կրթական մոդելով գործող առաջին միջազգային գիշերօթիկ դպրոցն է։ Դպրոցը բացվել է 2014 թ․-ին, և այնտեղ այժմ սովորում է 218 ուսանող՝ 77 երկրից: Սովորողների 92%-ն ստանում է լրիվ կամ մասնակի կրթաթոշակ: UWC Դիլիջանը համայնք է, որի նպատակն է տարբեր մշակույթներ ներկայացնող պատանիների համար հավասար և վերափոխիչ կրթության միջոցով կառուցել ավելի խաղաղ, արդար և կայուն աշխարհ։ Դպրոցը կարևոր դեր է խաղում Դիլիջանի զարգացման գործում՝ նպաստելով տարածաշրջանի տնտեսական զարգացմանն ու ծառայելով տեղացիների զբաղվածության կարևոր հարթակ։ Դպրոցն արժանացել է ճարտարապետության և նախագծման ոլորտներում մի շարք հեղինակավոր մրցանակների, այդ թվում էկոլոգիական որակի լավագույն ցուցանիշ համարվող BREEAM հավաստագրի։

2014 թ․-ից գործող Դիլիջանի համայնքային կենտրոնն առանցքային դեր է խաղում քաղաքում կրթական, մշակութային և սոցիալական նախագծերի իրականացման գործում: Կենտրոնի բացման օրվանից ավելի քան 2500 տեղացիներ մասնակցել են համայնքային կենտրոնի միջոցառումներին ու դասընթացներին, իսկ 10 տեղացի պատանիներ ընդունվել են Աշխարհի Միացյալ Քոլեջների ցանցի դպրոցներ։ Համայնքային զարգացման ծրագրերից շատերն իրականացվել են տեղական և միջազգային կազմակերպությունների ու հաստատությունների հետ։ Դրանցից են Դիլիջանի համայնքապետարանը, Հայաստանում ԱՄՆ Խաղաղության Կորպուսը, Դելավերի համալսարանը (ԱՄՆ), Սեմ Հյութոն պետական համալսարանը (ԱՄՆ, Տեխաս), Good Deeds Day միջազգային շարժումը և ուրիշներ։

JUST DILIJAN IT!-ն առաջին միջազգային ամառային ծրագրերն են Հայաստանում, որոնք նախատեսված են 10 –16 տարեկան երեխաների համար և անցկացվում են 2013 թվականից UWC Դիլիջան դպրոցի տարածքում: Հատուկ մշակված ձևաչափի ծրագրերը և յուրահատուկ պայմանները թույլ են տալիս ճիշտ համադրել հանգիստը և զարգացումը, գրավիչ հետազոտությունները և տարբեր երկրներից ընկերներ ձեռք բերելու հնարավորությունը: Ծրագրերը կազմակերպում է Scholae Mundi Armenia հիմնադրամը, որը կանգնած է UWC Դիլիջան դպրոցի ակունքներում: Լրացուցիչ տեղեկատվություն կարող եք ստանալ JUST DILIJAN IT! կայքից:

Քաղաքում UWC Դիլիջան դպրոցի և այլ կրթական հաստատությունների առկայության, ինչպես նաև Դիլիջանի համայնքային կենտրոնի ջանքերի շնորհիվ Դիլիջանն ընդգրկվել է ՅՈՒՆԵՍԿՕ «Ուսումնառու քաղաքներ» համաշխարհային ցանցում: 2016 թ․ նոյեմբերին ՅՈՒՆԵՍԿՕ-ն հրապարակել է «Կայուն զարգացող քաղաքների մշակույթ․ քաղաքային ապագա» համաշխարհային զեկույցը, որում Դիլիջանը ներկայացված է որպես կայուն զարգացման առավել ճանաչված օրինակներից, իսկ UWC Դիլիջանի բացումը ճանաչվել է այդ զարգացման հիմնական շարժիչ ուժը։

2017 թ․-ին IDeA հիմնադրամը սկսեց իրականացնել «Դիլիջանի և հարակից համայնքների զարգացման նախաձեռնություն» երկամյա ծրագիրը, որը համաֆինանսավորվել է Եվրոպական միության և Հայաստանի Տարածքային կառավարման և զարգացման նախարարության կողմից՝ Տարածաշրջանային զարգացման պիլոտայի ծրագրի շրջանակում։

Ծրագրի անմիջական շահառու են դարձել Դիլիջանի և հարակից համայնքների՝ Հովքի, Աղավնավանքի, Խաչարձանի, Գոշի, Հաղարծնի, Թեղուտի առնվազն 340 բնակիչ, ստեղծվել է 50 կայուն աշխատատեղ, ավելի քան 100 ձեռնարկություն աջակցություն են ստացել՝ զարգացնելու զբոսաշրջության, հյուրընկալության, արվեստների ու արհեստների ոլորտում գործող տեղական տնտեսություններն ու ստեղծել նորերը։

Ծրագրի շրջանակում Դիլիջանում բացվել է Տավուշի մարզում առաջին Զբոսաշրջային տեղեկատվական կենտրոնը, որն արդեն ընդունել է ավելի քան 1000 զբոսաշրջիկ։ «Դիլիջան» ազգային պարկում զբոսանքի ու արշավի կազմակերպումն ավելի հարմարավետ ու հաճելի դարձնելու համար կառուցվել է չորս նոր արահետ և մեկ հեծանվային երթուղի, բարեկարգվել են պարկում արդեն իսկ գոյություն ունեցող ութ արահետները, որոնց վրա տեղադրվել են նորարարական լուծումներով հագեցած տեղեկատվական ցուցանակներ։

Դիլիջանի և հարակից համայնքների վարպետներն ու արհեստավորները օգտվում են ծրագրի շրջանակում բացված Արվեստների և արհեստների կենտրոնի (MADE) հնարավորություններից: Արհեստավորների ու վարպետների համար անհրաժեշտ տարածք, գույք և սարքավորումներ տրամադրելուց բացի, կենտրոնում աշխատող մասնագետները հնարավորություն ունեն իրենց արտադրանքը ներկայացնել և վաճառել քաղաքի տարբեր կետերում։

Մարզում փոքր և միջին ձեռներեցությունը խրախուսելու համար ծրագիրը դրամաշնորհ է տրամադրել նաև Դիլիջան, Հովք, Աղավնավանք, Խաչարձան, Գոշ, Հաղարծին, Թեղուտ համայնքների 8 փոքր և միջին ձեռնարկություններին, որոնք ընդհանուր առմամբ 31 աշխատատեղ են ստեղծել համայնքի բնակիչների համար։

Գյուղական և էկո տուրիզմի սիրահարների համար ծրագիրը Դիլիջանում կառուցել ու գործարկել է նաև Գյուղատնտեսական տաղավար և քաղաքային շուկա, որտեղ կվաճառվեն հարակից համայնքների ֆերմերների արտադրանքը։

IDeA-ի ծրագրով բարեկարգվել է նաև Դիլիջանի քաղաքային զբոսայգին, որը երկար տարիներ գտնվում էր լքված վիճակում։ Բարեկարգվել են այգու ճեմուղիները, խաղահրապարակը, տեղադրվել են նստարաններ ու աղբամաններ, արդիականացվել է այգու լուսավորությունը։