Մեր Գործունեությունը

«Բարեկամություն» զբոսայգու նախագիծ

2018թ.-ին IDeA-ն հանդես եկավ նոր նախաձեռնությամբ՝ վերակառուցելու Գյումրիի «Բարեկամություն» զբոսայգին: Այս նախագծով IDeA-ն վերահաստատում է իր հանձնառությունը՝ հզորացնելու տեղի համայնքը, զարկ տալու սոցիալական և տնտեսական փոփոխություններին և նպաստելու Գյումրիի կայուն զարգացմանը: Սա յուրահատուկ նախագիծ է, որը ներառում է կոմերցիոն, սոցիալական և մարդասիրական բաղադրիչներ՝ հիմնված մասնավոր-հանրային գործընկերության մոդելի վրա:

Մի քանի տարի տևած տեխնիկատնտեսական ուսումնասիրությունը ցույց տվեց, որ 1988թ.-ից ի վեր Գյումրին բաժանված է եղել միմյանցից անջատ գոտիների: Մենք վստահ ենք, որ «Բարեկամություն» զբոսայգին կապող օղակ կդառնա պատմական կենտրոնի, արդյունաբերական և բնակելի գոտիների միջև: Այս գաղափարն ավելի արդիական է դառնում՝ հաշվի առնելով այն հանգամանքը, որ զբոսայգուն հարակից տարածքը քաղաքի ամենաաշխույժ բնակելի և արդյունաբերական գոտիներից է:

Համայնքի կարիքներին արդյունավետ ծառայող զբոսայգի նախագծելու նպատակով քննարկումներ են կազմակերպվել քաղաքի բնակիչների լայն շրջանակի հետ։ Այդ քննարկումների արդյունքում քարտեզագրվել են քաղաքի հիմնական խնդիրները և զբոսայգու բաղադրիչները: Այս քննարկումների, ինչպես նաև մեծածավալ ուսումնասիրությունների հիման վրա նախագծվել են այգու հիմնական կոմպոնենտները:

Զբոսայգին ներկայում զբաղեցնում է 7.2 հա տարածք ՝ համադրելով երեք առանցքային ուղղությունների տարրեր.

• Քաղաքային զարգացում. էականորեն կբարելավվի քաղաքի ներկայիս ենթակառուցվածքը և կընդլայնվի հանրային տարածքների ընդհանուր մակերեսը
• Զբոսաշրջություն. զբոսայգին կդառնա Գյումրիի ևս մեկ զբոսաշրջային վայր՝ նպաստելով քաղաք այցելող զբոսաշրջիկների թվի աճին և ավելի հետաքրքիր դարձնելով նրանց տպավորությունները քաղաքում
• Սոցիալական նախաձեռնություն. զբոսայգին հարթակ կդառնա ներկայիս սոցիալական նախաձեռնությունների համար՝ խթանելով սոցիալական ձեռնարկատիրության նոր սերնդի գաղափարները և աջակցելով նրանց զարգացմանը:

Իր գործարկման բոլոր փուլերում զբոսայգին սոցիալական և տնտեսական ազդեցություն կունենա՝ սկսած շինարարության ընթացքում աշխատատեղերի ստեղծումից և տնտեսական ներդրումներից՝ մինչև տեղի բնակչության համար կայուն աշխատատեղերի ապահովումը: Այն կաջակցի նոր ձեռնարկությունների ստեղծմանն ու ընդլայնմանը, ինչպես նաև զբոսաշրջիկների թվի աճով պայմանավորված՝ քաղաքային տնտեսության զարգացմանը:

Անիի դիտակետի նախագիծ

Միջնադարում Անին կարևոր մայրաքաղաք էր, որը կապում էր արևելքի և արևմուտքի, հյուսիսի ու հարավի առևտրային ուղիները: Այն Հայկական աշխարհի կենտրոններից էր, սակայն 1045թ. այս քաղաքի անկմամբ աստիճանաբար սկսվեց Հայաստանի պետականության կորստի գործընթացը։

Կյանքի կոչվող այս նախագծի նպատակն է ստեղծել ժամանակակից դիտակետ, որը թույլ կտա հիանալ միջնադարյան Անիի տեսարանով:

Անին 2016թ. ներառվել է ՅՈՒՆԵՍԿՕ-ի համաշխարհային ժառանգության ցուցակում։ Անիի դիտակետը նոր զբոսաշրջային վայր կդառնա՝ գրավելով աշխարհի տարբեր անկյուններից ժամանած այցելուների:

Նախագիծն արդեն գրավել է մի քանի միջազգային կազմակերպությունների ուշադրությունը, ծրագրվում է սկսել դրա իրականացումն այս շահագրգիռ կողմերի հետ: Այն ներառում է դիտակետի և համապատասխան ենթակառուցվածքների ստեղծում՝ ճանապարհ դեպի դիտակետ, կայանատեղի, սրճարաններ, զբոսայգի և այլ հարմարություններ:

Նախագծի հայեցակարգը ամենասկզբնական փուլում է:

«Հույս» Գյումրիի շենացման ծրագիր

«Հույս» Գյումրիի շենացման հիմնադրամը (Gyumri Project Hope, GPH) ստեղծվել է 2015 թ. սեպտեմբերին Քոլոլյան հիմնադրամի կողմից: Հիմնադրամի սկզբնական նպատակն էր իրականացնել Գյումրի քաղաքի տնտեսական և ենթակառուցվածքային հնարավորությունների ուսումնասիրություն և միջազգային փորձի հիման վրա մշակել քաղաքի վերափոխման գործնական ծրագիր: «Հույս» Գյումրիի շենացման հիմնադրամն ստացավ Քոլոլյան ընտանիքի, IDeA հիմնադրամի, Հայկական բարեգործական ընդհանուր միության (ՀԲԸՄ) և Հայ օգնության միության (ՀՕՄ) աջակցությունը:

2016 թ․-ին հիմնադրամը հրապարակեց «Գումրիի ռազմավարական զարգացում» հետազոտությունը: Փաստաթղթի առաջնային նպատակն էր վերլուծել Գյումրիին վերաբերող մարտահրավերները և հնարավորությունները: Բացի այդ, հետազոտության նպատակն էր առաջարկել արդյունավետ լուծումներ զարգացման ոլորտում: Առաջարկված նախագծերից մի քանիսը կոչված էին խթանել տնտեսական աճը զբոսաշրջիկների հոսքի ավելացման, քաղաքի վերափոխման և մշակութային զարգացման շնորհիվ:

Հետազոտության շոշափելի արդյունքներից մեկը դարձավ «Կումայրի վերածնունդ» ծրագիրը, որը 2017 թ․-ին ստացավ Հայաստանի կառավարության աջակցությունը: «Հույս» Գյումրիի շենացման հիմնադրամը կարողացավ միավորել ՀՀ կառավարության, միջազգային ֆինանսական կազմակերպությունների, ինչպես նաև զարգացման ոլորտի կազմակերպությունների ջանքերը՝ խրախուսելու ներդրումները Գյումրի քաղաքում: 2017 թ. փետրվարից Գյումրիի պատմական թաղամասում՝ Կումայրիում, վերականգնվել է մի քանի փողոց, իսկ պատմական շենքերը գրավել են շատ մասնավոր ներդրողների ուշադրությունը:

Երեք տարում իրականացված լայնածավալ ուսումնասիրությունների շնորհիվ «Հույս» Գյումրիի շենացման հիմնադրամը հավաքել է և թվայնացրել է տվյալներ քաղաքի պատմական կենտրոնում պահպանված բոլոր շենքերի մասին, առաջարկել է դրանց պահպանման և վերականգնման մեթոդներ, ինչպես նաև տպագրել է «Պատմական ժառանգության պահպանման ուղեցույցը»: Այդ աշխատանքների արդյունքում մշակվել են նաև Կումայրի պատմական թաղամասի որոշ փողոցների գլխավոր հատակագծի և գոտիավորման նախագիծ առաջարկներ՝ հիմնված լավագույն միջազգային փորձի վրա: