Մեր գործունեությունը

Աջակցություն սիրիահայերին

Մենք համոզված ենք, որ կյանքեր փրկելը բացարձակ գերակայություն է, և մենք հարգում ենք յուրաքանչյուր սիրիահայի՝ սեփական ապագան որոշելու իրավունքը:

Մեկնարկել է
2016
Հանրային զեկույց

2016 թ-ին IDeA հիմնադրամը նախաձեռնեց դրամահավաք՝ աջակցելու և օգնելու սիրիական հակամարտությունից տուժած սիրիահայերին։ Նախաձեռնությունն աջակցություն է ցուցաբերել այն ընտանիքներին, որոնք ապրում էին Սիրիայում կամ փնտրում էին ժամանակավոր ապաստան Սիրիայից դուրս, ինչպես նաև նրանց, ովքեր մտադիր էին տեղափոխվել Հայաստան, ցանկանում էին վերաբնակվել կամ արդեն վերաբնակվել են Հայաստանում։

Ի լրումն բոլոր ջանքերին, որոնք ձեռնարկվել էին պետական, հանրային և միջազգային մակարդակներում, IDeA հիմնադրամը սկսեց դրամահավաքը՝ իր հիմնադիրների կողմից կատարելով 250 000 ԱՄՆ դոլարի նախնական ներդրում, որը բաշխվել է մեր ռազմավարական գործընկեր Հայկական բարեգործական ընդհանուր միության (ՀԲԸՄ), ինչպես նաև երեք հասարակական կառույցներ՝ «Հալէպ» հայրենակցական բարեսիրական կազմակերպության, «Վերադարձ Հայաստան» հիմնադրամի և «Առաքելություն Հայաստան» կազմակերպության միջև՝ սիրիահայերին աջակցության ծրագրեր իրականացնելու համար:

Շնորհիվ այս նախաձեռնության՝ ֆինանսական աջակցություն է ստացել 1 411 ընտանիք, Սիրիայից Հայաստան է տեղափոխվել 141 անձ, և 42 ընտանիք ստացել է բնակարանի վարձակալության սուբսիդավորում՝ Հայաստանում ապրելու համար: IDeA հիմնադրամը շարունակում է ֆինանսական աջակցություն տրամադրել «Առաքելություն Հայաստան» կազմակերպության միջոցով՝ սիրիահայ ընտանիքների բնակարանների վարձակալության սուբսիդավորման համար։

Հայաստան տեղափոխված սիրիահայերի համար կազմակերպվել են մի շարք վերապատրաստումներ և զբաղվածության հնարավորություններին նվիրված համաժողովներ: