ԷԿՈՀԱՄԱԿԱՐԳԱՅԻՆ ՀԱՐԹԱԿՆԵՐ

«ՃԱՄՓԱԲԱԺՆԻՆ» ՁԵՌԱԳԻՐԸ

Ռուբեն Վարդանյանի և Նունե Ալեքյանի հեղինակած «Ճամփաբաժանին» ձեռագիրը Հայաստանի և հայ ժողովրդի ապագայի մասին խոսելու հրավեր է: Հեղինակները ընթերցողին են ներկայացնում հայերի և Հայաստանի ճակատագրով մտահոգ մի խումբ մարդկանց երկար տարիների քննարկումների ու բանավեճերի արդյունքները, հաղորդում ապագայի իրենց տեսլականը, խոսում այդ ապագան կերտելու իրենց նախագծերի մասին և ձգտում ընդլայնել վստահության շրջանակը:

2017 թվականին մեկնարկած նախագիծը նպատակ ունի քննարկման մեջ ներգրավելու բոլոր նրանց, ովքեր անտարբեր չեն Հայաստանի և հայ ժողովրդի ապագայի նկատմամբ՝ համատեղ ուրվագծել ու համար ձեռք բերման արժանի ապագայի պատկերը: Հեղինակները հույս ունեն ընթերցողների հետ քննարկելու երկրի և ազգի զարգացման հնարավոր վեկտորներն ու մոդելները, կշռադատելու դրանց առավելություններն ու թերությունները և համատեղ սթափ գնահատման հիման վրա առաջարկելու այնպիսի մոդել, որն առավել արդյունավետությամբ կարող է բարեկեցություն, անվտանգություն և ազգային ինքնության պահպանում ապահովել 21-րդ դարում: Նախագծի հեղինակների կարծիքով, զարգացման հնարավոր ցանկացած մոդել պետք է վերլուծվի այս երեք հիմնական գործոնների հարաբերակցության առումով: Գոյություն ունեցող ամենատիպական մոդելներն են մետրոպոլիսի և ծայրագավառի, հաբային տնտեսության և պարկուճի մոդելները: Զարգացման տարբեր փուլերի համար հնարավոր է ընտրել տարբեր սցենարներ:

Ինչպե՞ս Հայաստանը դարձնել բարգավաճ երկիր։

Զարգացման ո՞ր մոդելն է մեզ համար նախընտրելի 21-րդ դարում։

Ժամանակակից աշխարհում որտե՞ղ կցանկանայինք տեսնել Հայաստանն ու հայությանը։

Ինչի՞ ենք ձգտում։

Ի՞նչ կցանկանայինք հանձնել ապագա սերունդներին։

Ի՞նչ ենք ակնկալում աշխարհից։

Փոխարենն ի՞նչ ենք պատրաստ առաջարկելու։

Ձեռագրում նկարագրվում են նաև 2000-ականների սկզբից գործընկերների և համախոհների հետ միասին իրականացվող նախագծեր, և թե ինչպես են այդ նախաձեռնությունները տեղավորվում փոխակերպումների ընդհանուր պատկերի մեջ, որոնք կարող են Հայաստանին և հայ ազգին մոտեցնել մեր երազանքների իրականացմանը:

Իր ստեղծման օրից մինչև օրս նախագիծը ներգրավել է շուրջ 1500 մարդու, որոնք հեղինակների և միմյանց հետ մասնակցել են Հայաստանի և հայ ժողովրդի ապագայի մասին քննարկումներին՝ միասին ստեղծելով նախագծեր, որոնք կնպաստեն արդյունավետ փոփոխությունների: